पिंपरी, दि. २० – शहरातील रस्त्यांवरील पायाभूत सुविधांचा कायापालट करण्याच्या उद्देशाने पिंपरी चिंचवड महापालिकेच्या महत्त्वाकांक्षी हरित सेतू प्रकल्पाला १९ सप्टेंबर रोजी झालेल्या स्थायी समितीच्या बैठकीत मान्यता देण्यात आली. शहरातील नागरिकांना आरोग्यदायी वातावरण उपलब्ध व्हावे तसेच पर्यावरणपूरक जीवनमान अधिक उंचावण्यासाठी हा उपक्रम पथदर्शी ठरणार आहे. तसेच पर्यावरणपूरक साधनांचा प्रभावी वापर करून शहरभर पसरलेल्या हरित क्षेत्रांना एकमेकांना जोडल्यास शहराची पर्यावरणीय गुणवत्ता वाढून त्याचा लाभ शहरवासियांना व्हावा यासाठी हा प्रकल्प उपयुक्त ठरणार आहे.
पिंपरी चिंचवडमधील वाढती रहदारी आणि शहरी विस्तारामुळे रस्त्यांचा विकास आराखडा तयार करून पादचारी, सायकलस्वार आणि सार्वजनिक वाहतूक वापरकर्त्यांसह सर्व नागरिकांच्या गरजा याद्वारे पुर्ण करण्यावर महापालिकेने भर दिला आहे. आंतरराष्ट्रीय मानांकनांच्या आधारे आधुनिक रस्त्यांचे जाळे तयार करण्यासाठी हरित सेतू प्रकल्पाची अंमलबजावणी शहरात करण्यात आली आहे. या प्रकल्पाला ब्लूमबर्ग फिलान्थ्रॉपीज आणि ग्लोबल डिझायनिंग सिटीज इनिशिएटिव्ह (जीडीसीआय) सारख्या जागतिक संस्थेचे सहकार्यही मिळाले आहे, जेणेकरून तज्ञ मार्गदर्शक या प्रकल्पास जोडले गेले आहेत.
पिंपरी चिंचवड शहरातील प्राधिकरण भागातील ५ चौ.कि.मी क्षेत्राची या पायलट प्रोजेक्टसाठी निवड करण्यात आली असून त्यामध्ये अच्छादित पदपथ व सायकल ट्रॅक विकसित करण्याचे महापालिकेचे नियोजन आहे. अर्बन स्ट्रीट डेव्हलपमेंट अंतर्गत विकसित करण्यात येणाऱ्या या प्रकल्पाचे उद्दिष्ट नागरिकांसाठी आरोग्यपूर्ण, स्वच्छतापुर्ण आणि पर्यावरणपूरक परिसर तयार करणे हे आहे. यामुळे खासगी मोटार वाहनावरील अवलंबित्व कमी होण्यास मदत मिळेल तसेच लहान मुले, दिव्यांग आणि वयोवृद्धांसाठी सुरक्षित वातावरण निर्माण होईल.
– शेखर सिंह, आयुक्त तथा प्रशासक, पिंपरी चिंचवड महानगरपालिका
पादचाऱ्यांसाठी, सायकलप्रेमी तसेच लहान शाळकरी मुलांसाठी आणि रहिवाशांसाठी सार्वजनिक परिसर हा स्वच्छ, सुंदर आणि उत्साहवर्धक बनवण्याच्या उद्देशाने आणि शहरातील नागरिकांमध्ये पायी चालणे, सायकल चालविणे आणि धावणे या दैनंदिन आरोग्यदायी सवयींचे महत्व रुजविण्यासाठी हरित सेतू हा उपक्रम राबविण्यात येत आहे. नक्कीच हा उपक्रम शहरातील नागरिकांचे जीवनमान उंचावण्यासाठी एक दिशादर्शक उपक्रम ठरेल याची मला खात्री आहे.
- “हरित सेतू” प्रकल्पाची वैशिष्ट्ये
- रस्ते पादचाऱ्यांच्या सुरक्षिततेला प्राधान्य देऊन विशेषत: लहान मुले आणि ज्येष्ठ नागरिकांसाठी सुरक्षित वातावरण तयार होणार
- आधुनिक ट्रॅफिक मॅनेजमेंट सिस्टममुळे अपघात कमी होण्यास मदत मिळेल आणि वाहतूक सुरळीत होण्यास मदत मिळणार
- सायकल ट्रॅकमुळे मोटार वाहनावरील अवलंबत्व कमी होऊन ध्वनी व वायू प्रदूषण कमी होण्यास मदत मिळणार
- नियोजित समांतर पार्किंगमुळे वाहनांसाठी अडथळा मुक्त रस्ता तयार होणार
- या सार्वजनिक वाहतूक स्नेही प्रकल्पामध्ये सुस्थितीतील बस स्टॉप आणि पादचाऱ्यांसाठी समान पातळीच्या पदपथांचा समावेश असणार
- पर्यावरणपूरक वातावरण, सार्वजनिक आरोग्य आणि पिंपरी-चिंचवडच्या पायाभूत सुविधा वाढवून शहरी विकासावर भर देण्यासाठी प्रकल्प फायदेशीर ठरणार
प्रकल्पासाठी महापालिका उभारणार २०० कोटींचे हरित कर्जरोखे
पिंपरी चिंचवड शहरातील हरित सेतू प्रकल्पाकरिता ग्रीन बॉन्ड म्हणजेच हरित कर्जरोखे विक्रीतून सुमारे २०० कोटींची रक्कम उभारण्यात येणार असून ग्रीन बॉन्ड उभारण्याची कार्यवाही लेखा विभागामार्फत सुरू आहे.
प्रकल्पाची थोडक्यात माहिती –
- प्रायोगिक तत्वावर प्राधिकरणातील ५ प्रमुख रस्त्यांचा विकास
- मुख्य उद्देश : रस्ते सुरक्षा, प्रदूषण नियंत्रण आणि शाश्वत शहरी विकास
- जागतिक संस्थेचे सहकार्य : ब्लूमबर्ग फिलान्थ्रॉपीज आणि जीडीसीआय सारख्या जागतिक संस्थांचे सहकार्य
- प्रकल्पास मंजूर रक्कम – सुमारे १३२.४३ कोटी रुपये
